Trucke

Wissn Sie was „trucke" is? Net „drucke" von „drucken", nee „trucke" mit nem T, wie Theodor? Ha jo, des is Kurpfälzisch. Hoische Sie mol die Gschicht. Hot sich genau so zugetraage.

Vor'm Bäckerstand auf dem Markt.

Kundin, Frau Anfang 40: Habt'er heit vun dem Rrehrrickä?

Verkäuferin, Frau Ende 50: Nee, koaner meh, leider.

K: Ach Gott noa, schun widder net. Letscht Woch habt'er schun koan meh' ghett.

V: Leider schun ausverkaaft.

K: Sie! Letscht Woch, wu ihr aa koan ghett hett, do bin isch dann vorne in eierm Lade gewese, uff der Hauptstrooß, weil isch sowieso dort unne war wege was annerm, do bin isch in eiern Lade gange un hab dort än Rrehrricke kaaft. Hah, isch saag ihne, der war vielleischt trrucke! Hah, den hot mer schier net esse kenne.

V macht ein mitleidiges Gesicht.

K: Des war so än oigschweißter. Oigschweißt, wisse Sie, so in Plaschtik. Do hab isch noch gfroogt, ob der aa frisch is! Ja, hot sie gsaagt, eier Verkaiferin!

V: Nie im Lewe! Nie im Lewe is was frisch, was oigschweißt is.

K: Am liebschte dät isch nunner gehe zu ihre un dät ihr saage, dass der Rrehrricke ganz trrucke war. Schad, dass'er koan mehr hebt, eirer war immer frisch.

V: Hah, nemme Sie doch mol vun dem Streusel do oder der Quarktort? Die sin aa ganz frisch.

K: Nää, mit so was kann isch dahoam net kumme. Des will moin Mann net. Der will blouß trruckene Kuche. Der Kuche, der muss bei'em trrucke soi, sunscht isst'er'n net!